उपनगराध्यक्षपदी आलोक चौधरी यांची निवड , शिवसेना–राष्ट्रवादी युती सत्तेत,
काँग्रेस बहुमत असूनही बाहेर
राष्ट्रवादीचे शाकीर भाई ठरले ‘किंगमेकर’
उध्दव इंगळे,
लोक योध्दा संपादक
पाथरी – नगरपरिषदेत झालेल्या नाट्यमय राजकीय घडामोडींनंतर शिवसेना (शिंदे गट) व राष्ट्रवादी काँग्रेस (अजित पवार गट) यांच्या युतीतून सत्ता स्थापन झाली आहे. उपनगराध्यक्षपदी शिवसेनेचे नगरसेवक आलोक चौधरी यांची सर्वानुमते निवड झाल्याने शहराच्या राजकारणात मोठा उलटफेर झाला असून, संख्याबळ असूनही काँग्रेसला सत्तेबाहेर राहावे लागले आहे.
नगरपरिषदेच्या सभागृहात आयोजित विशेष सभेत
पिठासीन अधिकारी कोमल सावरे यांच्या उपस्थितीत व नगराध्यक्ष आसेफ खान यांच्या अध्यक्षतेखाली ही निवड प्रक्रिया पार पडली. सभेत काँग्रेसचे १२, शिवसेनेचे ९ आणि राष्ट्रवादी काँग्रेसचे २ असे एकूण २३ सदस्य उपस्थित होते. शिवसेना–राष्ट्रवादी युतीकडे ११ मते होती. नगराध्यक्षांचे निर्णायक मत धरून युतीकडे एकूण १२ मते झाली, तर काँग्रेसकडेही १२ मते होती. समसमान स्थितीत अध्यक्षांच्या अधिकारातील निर्णायक मत शिवसेना गटाच्या बाजूने गेल्याने आलोक चौधरी यांची उपनगराध्यक्षपदी निवड निश्चित झाली.
सत्तास्थापनेत स्वीकृत सदस्यपदी राष्ट्रवादी काँग्रेस (अजित पवार गट) यांच्याकडून माजी नगराध्यक्ष मोईज अन्सारी मास्टर यांची, तर काँग्रेसकडून माजी आमदार बाबाजानी दुर्राणी यांची निवड करण्यात आली आहे.
निवडीनंतर शिवसेनेचे अल्पसंख्यांक प्रदेशाध्यक्ष सईद भैया खान यांनी उपस्थित नागरिकांना संबोधित करताना पाथरी नगरपरिषदेला मराठवाड्यातील विकासाचे ‘रोल मॉडेल’ शहर बनवण्याचा निर्धार व्यक्त केला. सर्व घटकांना समान न्याय देत रोजगारनिर्मिती, व्यापाऱ्यांसाठी गाळे, आधुनिक उद्याने व पायाभूत सुविधांना प्राधान्य दिले जाईल, असे त्यांनी सांगितले.
दरम्यान, सत्तास्थापनेनंतर शहरातून भव्य विजयी रॅली काढण्यात आली. या रॅलीत शिवसेना व राष्ट्रवादी काँग्रेसचे कार्यकर्ते तसेच नागरिक मोठ्या संख्येने सहभागी झाले होते. कार्यक्रमाची सांगता नगराध्यक्ष आसेफ खान यांच्या फार्महाऊसवर आयोजित भोजन व्यवस्थेने झाली.
या निवडणुकीत राष्ट्रवादी काँग्रेसचे केवळ दोन नगरसेवक निवडून आले असले तरी त्यांनी निर्णायक भूमिका बजावत शहराच्या राजकारणात ‘किंगमेकर’ची भूमिका निभावली. शिवसेना शिंदे गटासोबत युती करत सत्ता स्थापन करण्यात आली. यामध्ये माजी नगराध्यक्ष व नगराध्यक्षपदाचे उमेदवार मोईज मास्टर अन्सारी यांना स्वीकृत सदस्य म्हणून नगरपालिकेत स्थान देण्यात आले. पुढील अडीच वर्ष उपनगराध्यक्षपद राष्ट्रवादीकडे राहणार आहे. ही सर्व राजकीय गणिते जुळवून आणण्यात शाकीर भाई यांनी मोलाची भूमिका बजावल्याचे मत शिवसेना जिल्हाप्रमुखांसह सईद भैया खान यांनी व्यक्त केले.
शिवसेना–राष्ट्रवादी काँग्रेस युतीच्या सत्तास्थापनेमुळे पाथरी नगरपरिषदेच्या राजकारणात नवा अध्याय सुरू झाला असून, आगामी काळात विकासाला गती मिळेल, अशी अपेक्षा नागरिकांतून व्यक्त होत आहे
संपादक : उध्दव नामदेवराव इंगळे
