पाथरीत राजकीय संघर्ष टोकाला; पाचही गटांत बहुरंगी लढतींनी वातावरण तापले

 

 

उध्दव इंगळे लोक योध्दा न्युज

पाथरी जिल्हा परभणी 

पाथरी जि.प.व पंचायत समिती सार्वत्रिक निवडणुकांच्या पार्श्वभूमीवर राजकीय वातावरण कमालीचे तापले असून, पाचही गटांत बहुरंगी आणि चुरशीच्या लढती रंगत आहेत. महायुती आणि महाविकास आघाडीतील अंतर्गत संघर्ष, बंडखोरी आणि अपक्ष उमेदवारांमुळे यावेळी निवडणूक गणित अधिकच गुंतागुंतीचे बनले आहे.

जिल्हा परिषदेच्या पाचही गटांत प्रमुख राजकीय पक्षांनी ताकदवान उमेदवार उतरवले असून, कुणाचे पारडे जड राहणार याकडे संपूर्ण तालुक्याचे लक्ष लागले आहे.

महायुतीतच आमने-सामने, बाभळगावात तिन्ही पक्ष भिडले

जिल्हा परिषदेच्या चार गटांत महायुतीतील राष्ट्रवादी काँग्रेस आणि शिंदेसेना एकमेकांविरुद्ध उभे ठाकले आहेत, तर बाभळगाव गटात महायुतीतील राष्ट्रवादी, शिंदेसेना आणि भाजप असे तिन्ही पक्ष एकमेकांविरोधात रिंगणात उतरल्याने ही लढत अधिकच लक्षवेधी ठरली आहे.

दुसरीकडे, महाविकास आघाडीतील काँग्रेस आणि उद्धवसेना यांच्यातही थेट संघर्ष पाहायला मिळत आहे. काँग्रेसने चार गटांत उमेदवार दिले असून, हदगाव बु. गटात मात्र उमेदवार न देता स्थानिक समीकरणांनुसार भूमिका घेतली आहे. उद्धवसेनेकडून चार गटांत उमेदवार देण्यात आले आहेत.

देवनांद्रा गटात बंडखोरीने समीकरणे बदलली

देवनांद्रा गटात शिंदेसेनेतील अंतर्गत बंडखोरीमुळे निवडणूक अधिकच चुरशीची बनली आहे. शिंदेसेनेकडून इच्छुक असलेले विक्रम गायकवाड यांनी बंडखोरी करत आपल्या पत्नी पूजा गायकवाड यांची अपक्ष उमेदवारी दाखल केली. विशेष म्हणजे, विक्रम गायकवाड यांना शिंदेसेनेकडून अधिकृत उमेदवारी मिळूनही त्यांनी माघार घेतल्याने या गटात शिंदेसेनेचा अधिकृत उमेदवारच नाही.

जिल्हा परिषद व पंचायत समितीतील पक्षीय चित्र

जिल्हा परिषद निवडणुकीत

राष्ट्रवादी काँग्रेस – ५ गट

शिंदेसेना – ५ गट

काँग्रेस – ४ गट

उद्धवसेना – ४ गट

भाजप – १ गट

पंचायत समितीच्या १० गणांत

राष्ट्रवादी काँग्रेस – १० गण

शिंदेसेना – ८ गण

काँग्रेस – ७ गण

उद्धवसेना – ७ गण

भाजप – ३ गण

तर रामपुरी खु. गणात भाकपने काँग्रेससोबत युती करत काँग्रेसच्या पाठिंब्यावर उमेदवारी मिळवली आहे.

बाभळगाव गटात पंचरंगी महासंग्राम

बाभळगाव गटातील निवडणूक तालुक्यातील सर्वाधिक लक्षवेधी ठरत आहे.

राष्ट्रवादी काँग्रेस – वैजंतीबाई रनेर

काँग्रेस – राजाबाई शिंदे

शिंदेसेना – सुमन गिराम

उद्धवसेना – डॉ. मोनिका शिंदे

भाजप – सारिका कोल्हे

पाचही प्रमुख पक्षांचे उमेदवार रिंगणात असल्याने येथे थेट पंचरंगी लढत रंगली आहे.

हदगाव बु. मध्ये परंपरागत संघर्ष पुन्हा

हदगाव बु. गटात गेल्या १५ वर्षांपासून सुरू असलेली परंपरागत लढत यावेळीही कायम आहे. उद्धवसेनेचे सुरेश ढगे आणि राष्ट्रवादी काँग्रेसचे अजिंक्य नखाते यांच्यातील संघर्ष पुन्हा उफाळून आला असून, शिंदेसेनेकडून शकुंतला फासाटे रिंगणात असल्याने येथे तिरंगी चुरस निर्माण झाली आहे.

*इतर गटांतही अटीतटीची लढत*

देवनांद्रा गट : सुमन उगले (शिंदेसेना), दुर्गा उगले (काँग्रेस), सोनाली थोरे (राष्ट्रवादी), शांताबाई इंगळे (उद्धवसेना), पूजा गायकवाड (अपक्ष) – पंचरंगी संघर्ष

कासापुरी गट : जनाबाई वाकणकर (काँग्रेस), अरुण कोल्हे (राष्ट्रवादी), डॉ. राम शिंदे (उद्धवसेना), रंगनाथ वाकणकर (शिंदेसेना) – चौरंगी लढत

लिंबा गट : शुभम टाकळकर (शिंदेसेना), दत्तराव मायंदळे (काँग्रेस), रुक्मिणी भोसले (राष्ट्रवादी) – तिरंगी लढत

निकालांकडे सर्वांचे लक्ष

बहुरंगी लढती, आघाड्यांतील अंतर्गत संघर्ष, बंडखोरी आणि स्थानिक समीकरणांमुळे पाथरी तालुक्यातील जिल्हा परिषद व पंचायत समिती निवडणूक अत्यंत अटीतटीची ठरणार आहे. अखेर मतदार कुणाच्या बाजूने कौल देणार, हे निकालानंतरच स्पष्ट होणार आहे.