लोकनेते अनिलराव नखाते यांच्या वाढदिवसानिमित्त सामाजिक बांधिलकीचा जागर!! २२६ मुलींना ड्रेस; १३१ रुग्णांची तपासणी, ४० ज्येष्ठांना किराणा किटचे वाटप
उध्दव इंगळे,
लोक योद्धा न्युज संपादक
पाथरी (वार्ताहर) : वाढदिवसाचा अनावश्यक खर्च टाळून सामाजिक बांधिलकी जपण्याचा संदेश बाजार समितीचे सभापती तथा वाल्मिकी शिक्षण प्रसारक मंडळाचे अध्यक्ष अनिलराव नखाते यांच्या वाढदिवसानिमित्त देण्यात आला. दुष्काळी परिस्थितीचे भान ठेवून विविध संस्थांच्या पुढाकारातून २२६ एकल पालक मुलींना ड्रेसचे वाटप, १३१ रुग्णांची मोफत तपासणी व औषधोपचार, तसेच ४० ज्येष्ठ नागरिकांना किराणा किट आणि फळांचे वाटप करण्यात आले. शुक्रवारी (दि. ९) हे समाजोपयोगी उपक्रम राबविण्यात आले.
पाथरी येथील शांताबाई नखाते विद्यालयात आयोजित कार्यक्रमाच्या अध्यक्षस्थानी अनिलराव नखाते होते. यावेळी भावनाताई नखाते, पंचायत समितीचे सभापती रामप्रसाद डुकरे, आदित्य नखाते, दिलीप हिबारे, नागनाथ कदम, संजय पामे यांच्यासह मान्यवर उपस्थित होते.
*समाजकारणाला प्राधान्य : भावनाताई नखाते*
अनिलराव नखाते यांनी नेहमीच समाजकारणाला प्राधान्य दिले. त्यांच्या पाठिंब्यामुळेच आपल्याला राजकारण आणि समाजकारणात काम करण्याची संधी मिळाली, असे भावनाताई नखाते यांनी सांगितले.
*उपक्रमांमुळे कृतज्ञ : अनिलराव नखाते*
दुष्काळी परिस्थिती लक्षात घेऊन वाढदिवसानिमित्त हार-तुरे स्वीकारणार नसल्याचे आवाहन केले होते. त्याला प्रतिसाद देत विविध संस्थांनी समाजोपयोगी उपक्रम राबविले. याबद्दल आपण कृतज्ञ असल्याचे अनिलराव नखाते यांनी सांगितले.
दरम्यान, हादगाव बु. येथे डॉ. दीपक दिरंग यांच्या पथकाने १३१ नागरिकांची आरोग्य तपासणी करून औषधोपचार केले. तेथे नऊ, तर देवनांद्रा येथील स. गो. नखाते माध्यमिक विद्यालयात ३७ एकल पालक मुलींना ड्रेसचे वाटप करण्यात आले. पाथरी येथील ॐकार वृद्धाश्रमातील ४० ज्येष्ठ नागरिकांना किराणा किट व फळे देण्यात आली.
कार्यक्रमाचे प्रास्ताविक के. एन. डहाळे यांनी केले. ए. टी. सोनवणे यांनी सूत्रसंचालन केले, तर प्राचार्य आर. व्ही. कांबळे यांनी आभार मानले.
लोक योद्धा न्युज
संपादक : उध्दव नामदेवराव इंगळे
