शेतकऱ्यांच्या बांधावर सरकार, पावसाच्या प्रतीक्षेत शिवार, पाथरी तालुक्यात पालकमंत्री बोर्डीकरांची पाहणी; शेतकऱ्यांना तातडीच्या मदतीची गरज
पाथरी : लोक योद्धा न्युज
उध्दव इंगळे मुख्य संपादक
आभाळाकडे डोळे लावून बसलेल्या शेतकऱ्यांच्या शिवारात पावसाची प्रतीक्षा दिवसेंदिवस वाढत आहे. पावसाने दीर्घ ओढ दिल्याने सोयाबीन, कापूससह खरीप पिकांची वाढ खुंटली असून अनेक ठिकाणी पिके संकटात सापडली आहेत. अशा परिस्थितीत बुधवारी पालकमंत्री मेघना साकोरे-बोर्डीकर यांनी थेट शेतकऱ्यांच्या बांधावर पोहोचत पिकांची पाहणी केली. हादगाव, सारोळा खुर्द, वडीसह विविध गावांच्या शिवारात त्यांनी शेतकऱ्यांशी संवाद साधून पावसाची स्थिती, पिकांची अवस्था आणि झालेल्या नुकसानीची माहिती घेतली.
पावसाच्या प्रतीक्षेत उभ्या असलेल्या पिकांकडे पाहताना शेतकऱ्यांच्या अडचणींचे गांभीर्य प्रकर्षाने जाणवत होते. अनेक ठिकाणी पिकांची वाढ खुंटली असून उत्पादनावर मोठा परिणाम होण्याची भीती शेतकऱ्यांनी व्यक्त केली. हातातोंडाशी आलेल्या खरीप हंगामावर पावसाअभावी संकट ओढवल्याने आता शासनाच्या मदतीकडे शेतकऱ्यांचे लक्ष लागले आहे.
हादगाव येथील अंबादास गंगाराम खंडागळे यांच्या शेतातील पिकांची पाहणी करताना पालकमंत्री बोर्डीकर यांनी शेतकऱ्यांशी सविस्तर संवाद साधला. पावसाची स्थिती, पिकांची वाढ, नुकसानीचे स्वरूप आणि शेतकऱ्यांना भेडसावणाऱ्या अडचणी जाणून घेतल्या. प्रत्यक्ष शिवारात जाऊन परिस्थितीचा आढावा घेत शासनस्तरावर आवश्यक उपाययोजनांसाठी माहिती संकलित केली जात असल्याचे त्यांनी सांगितले.
‘हिम्मत खचू देऊ नका, शासन तुमच्या पाठीशी’
पावसाने ओढ दिल्याने जिल्ह्यात दुष्काळसदृश परिस्थिती निर्माण झाली आहे. शेतकऱ्यांनी हिम्मत खचू देऊ नये. शासन त्यांच्या पाठीशी असून मुख्यमंत्री देवेंद्र फडणवीस स्वतः शेतकऱ्यांच्या बांधावर जाऊन परिस्थितीची पाहणी करत आहेत. सध्याच्या परिस्थितीचा आढावा घेत असून लवकरच कोरडा दुष्काळ जाहीर करण्याबाबत निर्णय घेतला जाईल, असे पालकमंत्री मेघना साकोरे-बोर्डीकर यांनी सांगितले.
नुकसानग्रस्त शेतकऱ्यांना मदतीची अपेक्षा
पाथरी तालुक्यातील अनेक भागांत पावसाअभावी खरीप पिकांचे नुकसान झाले आहे. प्रत्यक्ष बांधावर जाऊन परिस्थिती जाणून घेतल्याने शेतकऱ्यांच्या अडचणींचे गांभीर्य समोर आले आहे. नुकसानग्रस्त एकही शेतकरी मदतीपासून वंचित राहणार नाही, अशी ग्वाही पालकमंत्र्यांनी दिली. मात्र, पावसाची प्रतीक्षा लांबत चालल्याने आता पाहणीसोबतच तातडीच्या मदतीची गरज असल्याची भावना शेतकऱ्यांमधून व्यक्त होत आहे.
बांधावर पोहोचले विटेकर; पिकांच्या नुकसानीचा घेतला आढावा
डोंगरगाव ते रेणापूर शिवारात पाहणी; शेतकऱ्यांशी साधला थेट संवाद
पाथरी : आमदार राजेश विटेकर यांनीही पाथरी तालुक्यातील डोंगरगाव, वरखेड, हादगाव, वडी, पाथरी आणि रेणापूर शिवारातील बाधित पिकांची प्रत्यक्ष पाहणी केली. पावसाअभावी सोयाबीन, कापूससह अन्य खरीप पिकांची झालेली अवस्था त्यांनी शेतकऱ्यांकडून जाणून घेतली.
शिवारात फिरताना पिकांची खुंटलेली वाढ, जमिनीतील कमी ओलावा आणि पावसाच्या प्रतीक्षेत असलेली शेती यामुळे निर्माण झालेली परिस्थिती त्यांच्या निदर्शनास आली. यावेळी शेतकऱ्यांनी पिकांचे नुकसान, उत्पादनातील संभाव्य घट आणि आगामी हंगामासमोरील अडचणी याबाबत आमदार विटेकर यांच्याशी संवाद साधला.
पावसाअभावी अडचणीत आलेल्या शेतकऱ्यांना तातडीची मदत मिळणे आवश्यक असल्याचे पाहणीदरम्यान स्पष्ट झाले. शेतकऱ्यांच्या अडचणी शासनाच्या निदर्शनास आणून देण्यासाठी प्रत्यक्ष परिस्थितीचा आढावा घेतला जात असल्याचे यावेळी सांगण्यात आले.
अधिकारी, पदाधिकारी व शेतकरी उपस्थित
पालकमंत्र्यांच्या पाहणीवेळी उपविभागीय अधिकारी संगीता चव्हाण, तहसीलदार नितीन गर्जे, जिल्हा अधीक्षक कृषी अधिकारी भास्कर कोळेकर, तालुका कृषी अधिकारी गोविंद कोल्हे, पोलीस निरीक्षक लक्ष्मण केंद्रे, माजी सभापती अनिलराव नखाते, माजी जि.प. उपाध्यक्षा भावनाताई नखाते, प्रेरणा वरपुडकर, जिल्हा बँकेचे संचालक दत्तराव मायंदळे, बाजार समितीचे संचालक अशोकराव गिराम, पी.आर. शिंदे, तालुकाध्यक्ष स्वराज घुंबरे, भागवत वाकणकर यांच्यासह मंडळ अधिकारी, तलाठी, ग्रामसेवक व शेतकरी उपस्थित होते.
संपादक : उध्दव नामदेवराव इंगळे
