मराठवाड्यातील शेतकऱ्यांना दिलासा द्या; पीक विम्याचे चार ट्रिगर पूर्ववत करा! आ. राजेश विटेकर यांची उपमुख्यमंत्री सुनेत्रा पवारांकडे जोरदार मागणी; विशेष आर्थिक पॅकेज जाहीर करण्याचीही मागणी
आ. राजेश विटेकर यांची उपमुख्यमंत्री सुनेत्रा पवारांकडे जोरदार मागणी; विशेष आर्थिक पॅकेज जाहीर करण्याचीही मागणी
लोक योद्धा न्यूज नेटवर्क | पाथरी
मराठवाड्यात जून-जुलै महिन्यात झालेल्या अत्यल्प व खंडित पावसामुळे खरीप हंगामातील शेतकरी मोठ्या संकटात सापडला आहे. सोयाबीन, कापूस, तूर, मूग, उडीद, मका यांसह विविध पिकांचे मोठ्या प्रमाणात नुकसान झाले असून, अनेक भागांत जमिनीतील ओलावा संपल्याने पिकांची वाढ खुंटली आहे. त्यातच विहिरी व बोअरवेल आटल्याने पिकांसोबतच जनावरांच्या पाणी व चाऱ्याचाही प्रश्न गंभीर बनला आहे.
या पार्श्वभूमीवर आमदार राजेश विटेकर यांनी उपमुख्यमंत्री सुनेत्रा पवार यांची भेट घेऊन शेतकऱ्यांच्या प्रश्नांकडे शासनाचे लक्ष वेधले. यावेळी त्यांनी निवेदन सादर करून पंतप्रधान पीक विमा योजनेतील रद्द केलेले चार ट्रिगर तातडीने पूर्ववत करावेत आणि नुकसानग्रस्त शेतकऱ्यांना पीक विम्याचा लाभ मिळवून द्यावा, अशी मागणी केली.
दुष्काळसदृश परिस्थितीचा गांभीर्याने विचार करण्याची मागणी
मराठवाड्यातील सद्यस्थिती ही शेतकऱ्यांसाठी अत्यंत चिंताजनक असून, शासनाने या परिस्थितीचा गांभीर्याने विचार करून शेतकऱ्यांसाठी विशेष आर्थिक पॅकेज जाहीर करावे, अशी मागणीही आ. विटेकर यांनी केली.
नैसर्गिक संकटामुळे शेतकरी आर्थिक अडचणीत सापडला आहे. त्यामुळे शासनाच्या मदतीपासून कोणताही शेतकरी वंचित राहू नये, यासाठी शासनस्तरावर सातत्याने पाठपुरावा करणार असल्याचे आ. विटेकर यांनी स्पष्ट केले.
“शेतकरी हा अर्थव्यवस्थेचा कणा आहे. त्याच्या हक्कासाठी आणि अडचणींच्या निवारणासाठी आपला संघर्ष व पाठपुरावा कायम सुरू राहील,” अशी भूमिका त्यांनी मांडली.
यावेळी परभणी राष्ट्रवादी महिला काँग्रेसच्या जिल्हाध्यक्षा भावनाताई नखाते आणि अनिलराव नखाते उपस्थित होते.
संपादक : उध्दव नामदेवराव इंगळे
