काशी हिंदी विद्यापीठाकडून सुनील तळेकर यांचा गौरव; पाथरीचा अभिमान उंचावला
उध्दव इंगळे,
लोक योध्दा, न्यूज मुख्य संपादक
पाथरी : समाजोपयोगी कार्य आणि वृत्तपत्र व्यवसायात प्रामाणिकपणा, सातत्य व निष्ठा जपणाऱ्या पाथरी (जि. परभणी) येथील वृत्तपत्र वितरक व धार्मिक पुस्तकांचे प्रमुख विक्रेते श्री. सुनील सूर्यकांतराव तळेकर यांचा काशी हिंदी विद्यापीठ, वाराणसी (उत्तर प्रदेश) यांच्या वतीने सन्मान करण्यात आला.
काशी हिंदी विद्यापीठाचे संस्थापक व कुलपती श्री. संभाजी बाविस्कर सर यांच्या शुभहस्ते सन्मानपत्र व सन्मानपदक प्रदान करून हा गौरव सोहळा संपन्न झाला. पाथरी येथे अत्यंत आत्मीय व घरगुती वातावरणात आयोजित करण्यात आलेल्या या सन्मान समारंभास विविध क्षेत्रांतील मान्यवरांची उपस्थिती लाभली.
यावेळी ज्येष्ठ विधीज्ञ श्री. बाळासाहेब तळेकर, श्री. टी. बी. कुलकर्णी, श्री. प्रमोद भारस वाडकर, श्री. राजीव पामे, श्री. गजानन उंबरकर, श्री. विजयकुमार नाईकवाडे, तसेच सौ. उमा तळेकर व सौ. जयश्री तळेकर यांच्यासह अनेक मान्यवर उपस्थित होते. उपस्थितांनी श्री. तळेकर यांचा पुष्पगुच्छ देऊन सत्कार करत मनःपूर्वक शुभेच्छा व्यक्त केल्या.
सत्कारप्रसंगी बोलताना कुलपती श्री. संभाजी बाविस्कर म्हणाले,
“वृत्तपत्र सेवा ही केवळ उपजीविकेचे साधन नसून समाजप्रबोधनाचे प्रभावी माध्यम आहे. उन्हाळा, पावसाळा व हिवाळा—तीनही ऋतूंमध्ये सातत्याने, निष्ठेने व प्रामाणिकपणे ही सेवा बजावणाऱ्या सुनील तळेकर यांचा सन्मान करणे हे आमचे सामाजिक कर्तव्य आहे.”
या गौरवामुळे पाथरी शहरासह संपूर्ण परिसरात आनंद व समाधानाचे वातावरण निर्माण झाले असून, समाजातील विविध स्तरांतून श्री. तळेकर यांचे अभिनंदन होत आहे. हा सन्मान म्हणजे प्रामाणिक कष्ट, सेवा व निस्वार्थ भावनेची पावती असल्याची भावना नागरिकांत व्यक्त होत आहे.
संपादक : उध्दव नामदेवराव इंगळे
