पाथरी नगर परिषद निवडणूक तयारी भक्कम; निरीक्षक काटकरांची सकारात्मक नोंद
उध्दव इंगळे पाथरी –
लोक योद्धा न्यूज पोर्टल
पाथरी नगर परिषद सार्वत्रिक निवडणूक 2025 संदर्भात नियुक्त निवडणूक निरीक्षक श्री. राजेश काटकर यांनी 18 नोव्हेंबर रोजी पाथरी येथे दौरा करत निवडणूक तयारीचा सर्वांगीण आढावा घेतला. नगर परिषद कार्यालयातील विभागनिहाय कामकाज तसेच शहरातील काही निवडक मतदान केंद्रांची त्यांनी प्रत्यक्ष पाहणी केली.
पाहणी दरम्यान मतदान केंद्रांवरील आवश्यक सुविधा, व्यवस्थापन, दिव्यांगांसाठी उपलब्ध सोयी, सुरक्षा यंत्रणा व संपूर्ण व्यवस्था तपासण्यात आली. काही ठिकाणी सुधारणा गरजेच्या असल्याचे निदर्शनास आणत त्यांनी संबंधित मतदान केंद्र अधिकारी यांना आवश्यक सूचना दिल्या.
यानंतर निवडणूक निर्णय अधिकारी सौ. अरुणा संगेवार यांनी आतापर्यंत झालेल्या निवडणूक कामकाजाचा सविस्तर अहवाल सादर केला. उमेदवारी अर्ज दाखल करण्यापासून छाननीपर्यंतची प्रक्रिया, विविध पथकांची कार्यवाही, पारदर्शकता आणि नियोजनाबाबत माहिती निरीक्षक काटकर यांनी तपशीलवार जाणून घेतली.
निवडणूक प्रक्रियेत प्रशासनाने दाखवलेली सजगता, काटेकोर नियोजन आणि शिस्तबद्ध काम याबद्दल निरीक्षक काटकर यांनी समाधान व्यक्त करत सौ. अरुणा संगेवार व त्यांच्या टीमचे कौतुक केले. आगामी टप्प्यांतही निवडणूक प्रक्रिया अधिक सुबक आणि व्यवस्थित रितीने पार पाडण्यासाठी त्यांनी काही महत्त्वपूर्ण सुचना दिल्या.
पाथरी नगर परिषद निवडणुकीच्या तयारीचा हा आढावा यशस्वी ठरल्याचे निरीक्षकांनी नमूद केले असून पुढील कामकाजासाठी अधिकारी-कर्मचारी सज्ज राहण्याच्या सूचना देत त्यांनी पाहणी दौरा संपवला.
संपादक : उध्दव नामदेवराव इंगळे
