आ.सईद खान यांना पितृशोक , वडील शेरगुल खान यांचे निधन
उध्दव इंगळे ,
लोक योद्धा न्युज संपादक
पाथरी :
परभणी-हिंगोली विधान परिषदेचे आमदार सईद खान यांचे वडील तथा पाथरी येथील ज्येष्ठ नागरिक शेरगुल खान यांचे शनिवारी वयाच्या 84 व्या वर्षी वृद्धापकाळाने निधन झाले. त्यांच्या निधनाच्या वृत्ताने पाथरीसह परभणी व हिंगोली जिल्ह्यात शोककळा पसरली असून, विविध राजकीय, सामाजिक, शैक्षणिक, धार्मिक व व्यापारी क्षेत्रातील मान्यवरांसह असंख्य नागरिकांनी खान कुटुंबीयांचे सांत्वन केले.
शेरगुल खान हे अत्यंत साधी राहणी, शांत स्वभाव, प्रामाणिकपणा आणि माणुसकी जपणारे ज्येष्ठ म्हणून परिसरात सर्वपरिचित होते. कुटुंबातील ज्येष्ठ म्हणून त्यांनी आपल्या मुलांवर संस्कारांची भक्कम पायाभरणी केली. समाजातील प्रत्येक घटकाशी जिव्हाळ्याचे संबंध राखत त्यांनी आयुष्यभर आदर, आपुलकी आणि विश्वासाचे नाते जपले. त्यामुळे त्यांच्या निधनाने केवळ खान कुटुंबीयांनाच नव्हे, तर त्यांना जवळून ओळखणाऱ्या असंख्य नागरिकांनाही मोठा धक्का बसला आहे.
त्यांच्या निधनाची वार्ता समजताच विविध पक्षांचे लोकप्रतिनिधी, पदाधिकारी, सामाजिक कार्यकर्ते, व्यापारी, मित्रपरिवार आणि नागरिकांनी त्यांच्या निवासस्थानी धाव घेत कुटुंबीयांचे सांत्वन केले. सर्व स्तरांतून दिवंगत शेरगुल खान यांना भावपूर्ण श्रद्धांजली अर्पण करण्यात येत आहे.
दिवंगत शेरगुल खान यांच्या पार्थिवावर रविवार (दि. 12 जुलै) रोजी दुपारी 2 वाजता पाथरी येथे मुस्लिम धार्मिक परंपरेनुसार अंत्यसंस्कार करण्यात येणार आहेत. अंतिम दर्शनासाठी विविध क्षेत्रांतील मान्यवर व नागरिक मोठ्या संख्येने उपस्थित राहण्याची शक्यता आहे.
शेरगुल खान यांच्या पश्चात पाथरी नगर परिषदेचे नगराध्यक्ष आसिफ खान, विधान परिषदेचे आमदार सईद खान, परभणी जिल्हा मध्यवर्ती सहकारी बँकेचे संचालक मेहराज खान, तसेच पुत्र, सुना, नातवंडे आणि आप्तस्वकीय असा मोठा परिवार आहे.
शेरगुल खान यांच्या निधनाने खान कुटुंबाचा ज्येष्ठ आधारवड हरपला असून, पाथरी शहराने एक सुसंस्कृत, मनमिळावू आणि आदरणीय ज्येष्ठ नागरिक गमावला आहे. त्यांच्या साधेपणाच्या, माणुसकीच्या आणि स्नेहपूर्ण स्वभावाच्या आठवणी नागरिकांच्या मनात कायम राहतील, अशा भावना शोकसंदेशांमधून व्यक्त होत आहेत.
संपादक : उध्दव नामदेवराव इंगळे
