मध्यरात्रीचा थरार! दगडफेकीलाही न जुमानता पोलिसांचा थरारक पाठलाग; संशयितांची दोन बोलेरो जप्त
एटीएम फोडण्यासाठी वापरले जाणारे साहित्य, गॅस कटर, सिलेंडर, नायलॉन दोऱ्या व चाकू हस्तगत; परराज्यातील सराईत टोळीचा प्राथमिक संशय
| उध्दव इंगळे, लोक योद्धा संपादक
पाथरी….
पाथरी- परिसरात १५ जुलैच्या मध्यरात्री अक्षरशः चित्रपटातील थराराला साजेशी पोलिसी कारवाई पाहायला मिळाली. कंट्रोल रूमवरून संशयित वाहनांची माहिती मिळताच पाथरी व मानवत पोलिसांनी क्षणाचाही विलंब न करता सापळा रचला. त्यानंतर तब्बल दोन तास भरधाव वेगाने धावणाऱ्या दोन संशयित बोलेरो पिकअपचा जीवाची पर्वा न करता थरारक पाठलाग करण्यात आला. या दरम्यान संशयितांनी पोलिसांवर चालत्या वाहनातून दगडफेक करत सुटकेचा प्रयत्न केला; मात्र पोलिसांनी धैर्य, संयम आणि प्रसंगावधान दाखवत दोन्ही वाहने जप्त करण्यात यश मिळवले.
पोखरणी फाटा पाथरी येथे MH-23-W-4195 क्रमांकाची बोलेरो पिकअप अडविण्यासाठी पोलिसांनी रस्त्यावर लोखंडी पोल आडवा टाकून नाकाबंदी केली. मात्र संशयितांनी भरधाव वेगाने वाहन चालवत नाकाबंदी भेदली. पोलिसांनी तात्काळ पाठलाग सुरू केला.
याचवेळी DL-1LAA-9883 क्रमांकाची दुसरी बोलेरो पिकअप अडविण्यासाठी पोलिसांनी हातात लोखंडी रॉड घेऊन थेट रस्त्यावर उभे राहत वाहन थांबविण्याचा धाडसी प्रयत्न केला. मात्र चालकाने अचानक वाहनाला पोखरणी फाट्याकडे वळण देत वीटभट्टी परिसराचा फायदा घेत वाहन सोडून अंधारात पलायन केले.
दरम्यान पहिल्या वाहनाचा पाठलाग ढालेगाव पुलापर्यंत सुरू राहिला. वाहनाच्या केबिनवर चार ते पाच संशयितांनी पोलिसांवर चालत्या वाहनातून जोरदार दगडफेक केली. विशेष म्हणजे, दगडफेकीसाठी वाहनात आधीच दगडांचा साठा करून ठेवण्यात आला होता. जीव धोक्यात घालूनही पोलिसांनी पाठलाग सुरूच ठेवला. अखेर संशयितांनी वाहन रस्त्यावर सोडले आणि ढालेगाव परिसरातील ऊसशेतीचा फायदा घेत अंधारात पसार झाले.
जप्त करण्यात आलेल्या वाहनांमधून गॅस सिलेंडर, गॅस कटर, मोठी पकड, दोन लोखंडी टॉमी, अंदाजे २५ बंडल नायलॉन दोरी आणि चाकू असा संशयास्पद मुद्देमाल हस्तगत करण्यात आला. या साहित्याचा वापर एटीएम फोडणे किंवा जनावरे चोरीसारख्या गंभीर गुन्ह्यांसाठी होऊ शकतो का, याचा सर्व बाजूंनी तपास सुरू आहे. तसेच ही परराज्यातील सराईत टोळी असण्याची शक्यता पोलिसांकडून तपासली जात आहे.
दोन्ही वाहने पुढील कारवाईसाठी मानवत पोलीस ठाण्यात जमा करण्यात आली असून फरार संशयितांचा शोध सुरू आहे.
ही धाडसी कारवाई सहाय्यक पोलीस उपनिरीक्षक दर्शन शिंदे व पोलीस निरीक्षक लक्ष्मण केंद्रे यांच्या मार्गदर्शनाखाली पोलीस उपनिरीक्षक साहेबराव राठोड, सहाय्यक पोलीस उपनिरीक्षक संजय चव्हाण, हवालदार शेख अजगर, सय्यद उमर, सिद्धेश्वर पाळवदे, पोलीस नाईक समीर, पोलीस कॉन्स्टेबल नसीर शेख व जैस्वाल यांनी संयुक्तपणे पार पाडली.
या धाडसी कारवाईमुळे पाथरी-मानवत परिसरातील गुन्हेगारी प्रवृत्तीच्या टोळ्यांमध्ये मोठी धास्ती निर्माण झाली असून, चोरी, जनावरे चोरी व इतर मालमत्तेवरील गुन्ह्यांवर आळा बसण्यास मदत होईल, अशी अपेक्षा व्यक्त केली जात आहे. मध्यरात्री जीवाची पर्वा न करता केलेल्या या कारवाईबद्दल पाथरी व मानवत पोलिसांवर सर्व स्तरांतून कौतुकाचा वर्षाव होत आहे.
संपादक : उध्दव नामदेवराव इंगळे
