परभणी काँग्रेची धुरा मा.आ. बाबाजानी दुर्राणी यांच्या खांद्यावर; कार्यकर्त्यांत नव्या उर्जेचा संचार”
उध्दव इंगळे पाथरी
अखिल भारतीय काँग्रेस कमिटीच्या “संघटन सृजन अभियान” अंतर्गत राज्यभरातील संघटनात्मक आढावा, पदाधिकारी व कार्यकर्त्यांशी संवाद तसेच निरीक्षकांनी सादर केलेल्या अहवालाच्या आधारे काँग्रेस पक्षाचे राष्ट्रीय अध्यक्ष मल्लिकार्जुन खर्गे यांनी महाराष्ट्रातील विविध जिल्हा काँग्रेस कमिटी अध्यक्षांच्या नियुक्त्यांना मान्यता दिली आहे. त्यानुसार परभणी जिल्हा ग्रामीण काँग्रेसच्या जिल्हाध्यक्षपदी माजी आमदार बाबाजानी दुर्राणी यांची नियुक्ती करण्यात आली आहे.
बाबाजानी दुर्राणी यांच्या नियुक्तीमुळे परभणी जिल्ह्यात काँग्रेस कार्यकर्त्यांमध्ये नवचैतन्य निर्माण झाले असून पक्ष संघटनेला नवसंजीवनी मिळणार असल्याची भावना कार्यकर्त्यांमध्ये व्यक्त होत आहे. गेल्या वर्षभरात त्यांच्या काँग्रेस प्रवेशानंतर जिल्ह्यातील विविध राजकीय घडामोडींमध्ये काँग्रेसची उपस्थिती अधिक प्रभावीपणे जाणवू लागली होती. ग्रामीण भागातील जनसंपर्क, कार्यकर्त्यांशी असलेला सुसंवाद आणि संघटन उभारणीतील सक्रियता यामुळे त्यांच्याकडे सक्षम नेतृत्व म्हणून पाहिले जात आहे.
काँग्रेस पक्षाचा पुरोगामी, सर्वसमावेशक आणि जनतेच्या प्रश्नांशी बांधिल असलेला विचार तळागाळापर्यंत पोहोचविण्यासाठी संघटना अधिक बळकट करण्यावर भर दिला जाणार असल्याचे पक्षश्रेष्ठींनी स्पष्ट केले आहे. बाबाजानी दुर्राणी यांच्या नेतृत्वाखाली परभणी काँग्रेसमध्ये नव्या जोमाने संघटन बांधणी होईल, असा विश्वास पदाधिकारी व कार्यकर्त्यांनी व्यक्त केला आहे.
दरम्यान, आगामी निवडणुका तसेच परभणी-हिंगोली विधान परिषद निवडणुकीच्या पार्श्वभूमीवर बाबाजानी दुर्राणी यांची झालेली नियुक्ती राजकीयदृष्ट्या अत्यंत महत्त्वपूर्ण मानली जात आहे. ग्रामीण भागातील त्यांचा प्रभाव, विविध समाजघटकांशी असलेले संबंध आणि कार्यकर्त्यांमध्ये असलेली पकड याचा काँग्रेस पक्षाला आगामी निवडणुकांमध्ये निश्चितच फायदा होईल, अशी चर्चा राजकीय वर्तुळात सुरू आहे.
त्यांच्या नियुक्तीची घोषणा होताच जिल्हाभरातील काँग्रेस कार्यकर्त्यांनी आनंद व्यक्त करत स्वागत केले असून अनेक ठिकाणी अभिनंदनाचा वर्षाव होत आहे.
लोक योद्धा न्युज संपादक पाथरी
संपादक : उध्दव नामदेवराव इंगळे
