लाडक्या बहिणीच्या आशीर्वादाने पाथरी नगरपरिषदेवर शिवसेनेचा झेंडा फडकणार – खा. डॉ. श्रीकांत शिंदे
उध्दव इंगळे, लोक योध्दा न्युज
राज्याचे उपमुख्यमंत्री एकनाथ शिंदे यांनी मुख्यमंत्री असताना सुरू केलेल्या ‘लाडकी बहीण’ या महत्त्वाकांक्षी योजनेमुळे महिलांना मोठा न्याय मिळाला आणि त्याचा परिणाम म्हणून आज प्रत्येक सभेत महिलांचा उत्स्फूर्त प्रतिसाद पाहायला मिळतो. पाथरी नगरपरिषद निवडणुकीच्या पार्श्वभूमीवर आज आयोजित सभेलाही महिलांची उसळलेली गर्दी हीच गोष्ट पुन्हा अधोरेखित करणारी ठरली.
याच पार्श्वभूमीवर बोलताना शिवसेनेचे युवा नेते तथा खासदार डॉ. श्रीकांत शिंदे यांनी ठाम विश्वास व्यक्त केला की “लाडक्या बहिणीच्या आशीर्वादाने यंदाच्या निवडणुकीत पाथरी नगरपरिषदेवर शिवसेनेचाच झेंडा फडकेल.”
सभेमध्ये सामाजिक न्यायमंत्री संजय शिरसाठ, जिल्हाप्रमुख आनंद भरोसे, जिल्हा प्रभारी प्रमुख सईद खान, बीडचे अनिल दादा, तसेच नगराध्यक्ष पदाचे उमेदवार असेफ खान यांच्यासह सर्व नगरसेवकांची उपस्थिती होती.
■ मुलींच्या वस्तीगृहासाठी 25 कोटींचा निधी – संजय शिरसाठ
सभेत बोलताना सामाजिक न्यायमंत्री संजय शिरसाठ यांनी मोठी घोषणा केली.
“पाथरी शहरात 200 मुलींसाठी अत्याधुनिक वस्तीगृह उभारण्यासाठी 25 कोटी रूपयांचा निधी उपलब्ध करून देणार आहोत,” असे सांगत त्यांनी महिलांसाठीच्या बांधिलकीची पुन्हा पुनरावृत्ती केली.
■ मला दाबण्याचा प्रयत्न सुरू – सईद खान
शिवसेनेचे जिल्हा प्रभारी प्रमुख सईद खान यांनी सभेत स्पष्ट आरोप केला की,
“परभणी जिल्ह्यात शिवसेना उभारण्यासाठी मी प्रामाणिकपणे काम करत आहे. मात्र पक्षातील काही जण मला दाबण्याचा प्रयत्न करत आहेत. अशांनी आधी स्वतःचा बंदोबस्त करावा,” अशी टिप्पणी करत त्यांनी नाराजी व्यक्त केली.
पुढे बोलताना त्यांनी पाथरीकरांना आवाहन केले की,
“नगरपरिषद आम्हाला ताब्यात द्या, पाथरीच्या विकासाची नवी दिशा आम्ही दाखवू,” असा विश्वास त्यांनी व्यक्त केला.
ही सभा महिलांचा उत्स्फूर्त सहभाग, स्थानिक राजकीय समीकरणे आणि शिवसेनेच्या रणनीती यामुळे विशेष ठरली.
संपादक : उध्दव नामदेवराव इंगळे
