आमदार राजेशदादा विटेकरांच्या उपस्थितीत राष्ट्रवादीचे भव्य शक्तीप्रदर्शन जि.प.–पं.स उमेदवारी अर्ज दाखल –
उध्दव इंगळे मुख्य संपादक 
उध्दव इंगळे मुख्य संपादक
पाथरी (प्रतिनिधी) :
जिल्हा परिषद व पंचायत समिती निवडणुकीच्या पार्श्वभूमीवर पाथरी तालुक्यात राष्ट्रवादी काँग्रेस पार्टीकडून उमेदवारी अर्ज दाखल करताना आज भव्य शक्तीप्रदर्शन करण्यात आले. आमदार राजेशदादा विटेकर यांच्या प्रमुख उपस्थितीत हा अर्ज दाखल सोहळा उत्साहपूर्ण वातावरणात पार पडला.
हदगाव बु. जिल्हा परिषद गटातून अजिंक्य अनिलराव नखाते, बाभळगाव गटातून वैजयंताबाई अण्णासाहेब रणेर, लिंबा गटातून रुक्मिणीबाई पंडितराव भोसले, कासापुरी गटातून अरुण उर्फ बाळासाहेब कोल्हे यांच्यासह सर्व पंचायत समिती गणातील उमेदवारांनी आपले उमेदवारी अर्ज अधिकृतपणे दाखल केले.
आमदार राजेशदादा विटेकर यांच्या उपस्थितीमुळे कार्यकर्त्यांमध्ये प्रचंड उत्साह संचारला होता. अर्ज दाखल करताना हजारोंच्या संख्येने कार्यकर्ते व समर्थक रस्त्यावर उतरले होते. ढोल-ताशे, जोरदार घोषणाबाजी आणि जल्लोषाच्या वातावरणात संपूर्ण परिसर दुमदुमून गेला. या शक्तीप्रदर्शनामुळे पाथरी शहर व परिसरात राजकीय वातावरण तापल्याचे चित्र पाहायला मिळाले.
यावेळी उमेदवारांनी तळागाळातील जनतेचे प्रश्न, विकास, पारदर्शकता व लोकहित हे प्रमुख मुद्दे केंद्रस्थानी ठेवून निवडणूक लढवण्याचा निर्धार व्यक्त केला. राष्ट्रवादी काँग्रेसच्या विकासाभिमुख धोरणांना अधिक बळ देण्याचा संकल्प करत, जनतेच्या विश्वासावर आणि कार्यकर्त्यांच्या ताकदीवर निवडणूक जिंकून जिल्हा परिषदेत ठाम व प्रभावी आवाज उठवण्याचा निर्धार उमेदवारांनी व्यक्त केला.
या प्रसंगी सर्व गटांचे प्रमुख पदाधिकारी, आजी-माजी लोकप्रतिनिधी तसेच कार्यकर्ते मोठ्या संख्येने उपस्थित होते.
संपादक : उध्दव नामदेवराव इंगळे
