जि. प. व पंचायत समिती निवडणुकांच्या पार्श्वभूमीवर पाथरीत आचारसंहिता आढावा बैठक
मा. राज्य निवडणूक आयोगाने दिनांक १३ जानेवारी २०२६ रोजी घेतलेल्या पत्रकार परिषदेत महाराष्ट्रातील १२ जिल्हा परिषद व त्याअंतर्गत १२५ पंचायत समित्यांचा निवडणूक कार्यक्रम जाहीर केला असून, त्यानुषंगाने संपूर्ण राज्यात आदर्श आचारसंहिता लागू करण्यात आली आहे.
या पार्श्वभूमीवर पाथरी तालुक्यात आदर्श आचारसंहितेची प्रभावी अंमलबजावणी करण्यासाठी आज दिनांक १४ जानेवारी २०२६ रोजी तहसील कार्यालय, पाथरी येथे बैठक आयोजित करण्यात आली. सदर बैठक मा. तहसीलदार पाथरी यांच्या अध्यक्षतेखाली पार पडली.
या बैठकीस पाथरी तालुक्यातील सर्व पोलीस पाटील, पोलीस प्रशासनाचे अधिकारी, पत्रकार प्रतिनिधी, विविध राजकीय पक्षांचे प्रतिनिधी तसेच आचारसंहिता पथकातील अधिकारी व कर्मचारी उपस्थित होते. बैठकीदरम्यान निवडणूक प्रक्रियेदरम्यान आदर्श आचारसंहितेचा भंग होणार नाही, तसेच कायदा व सुव्यवस्था अबाधित राहील, यासाठी सर्व संबंधितांनी दक्षता घेण्याच्या स्पष्ट सूचना देण्यात आल्या.
तसेच निवडणूक कामासाठी नियुक्त अधिकारी व कर्मचाऱ्यांनी आपले कर्तव्य अचूक, पारदर्शक व नियमांचे पालन करून पार पाडावे, असे निर्देश तहसीलदारांनी दिले. निवडणूक प्रक्रिया शांततेत, निर्भय व निष्पक्ष वातावरणात पार पडण्यासाठी सर्वांनी सहकार्य करावे, असे आवाहनही यावेळी करण्यात आले.
या बैठकीस तहसीलदार श्री. शंकर एन. हंदेश्वर, गट विकास अधिकारी श्री. शैलेश वाव्हळे, नायब तहसीलदार श्री. धोटे, महसूल सहाय्यक श्री. केसकर, विस्तार अधिकारी श्री. संदीपान घुंबरे, श्री. आर. टी. राठोड, श्री. सुमित वाघमारे व श्री. मनेरे आदी अधिकारी उपस्थित होते.
संपादक : उध्दव नामदेवराव इंगळे
