गौंडगाव नदीपात्रातून अवैध वाळू वाहतूक करणारा टिपर जप्त; पो.नि. केंद्रे यांची धडक कारवाई
उध्दव इंगळे,
लोक योध्दा न्युज संपादक
पाथरी प्रतिनिधी—
पाथरी तालुक्यातील गौंडगाव येथील गोदावरी नदीपात्रातून अवैधरित्या वाळू उपसा करून वाहतूक करणारा एक टिपर पाथरी पोलिसांनी धडक कारवाई करत जप्त केला आहे. या प्रकरणी वाहन चालकाविरुद्ध पाथरी पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार पाथरी पोलीस निरीक्षक लक्ष्मण केंद्रे व पोलीस कर्मचारी बालाजी लटपटे हे पेट्रोलिंगवर असताना मिळालेल्या गुप्त माहितीच्या आधारे रेणुका माता मंदिराजवळील कच्च्या रस्त्याने गौंडगाव नदीपात्राकडे जाणाऱ्या टाटा कंपनीच्या लाल रंगाच्या टिपर (क्र. MH-12-DT-1844) वाहनाला अडविण्यात आले. तपासणीदरम्यान वाहनात वाळूचे कण आढळून आले.
चौकशीदरम्यान चालकाने आपले नाव लक्ष्मण आसाराम चिंचाणे (वय २६, रा. माळीवाडा, ता. पाथरी) असे सांगितले. त्याच्याकडे वाळू वाहतुकीसंदर्भातील कोणताही अधिकृत परवाना अथवा कागदपत्र नसल्याचे स्पष्ट झाले. चौकशी दरम्यान संबंधित ड्रायव्हरने अवैध वाळू वाहतुकीसाठीच हा ट्रक वापरत असल्याचे कबूल केले आहे. त्यामुळे पोलिसांनी सुमारे ५ लाख रुपये किमतीचा टिपर ताब्यात घेऊन पंचनामा केला व वाहन पोलीस ठाण्यात जमा करण्यात आले.
या प्रकरणी आरोपीविरुद्ध संबंधित कायद्यान्वये गुन्हा दाखल करण्यात आला असून पुढील तपास पोलीस निरीक्षक लक्ष्मण केंद्रे यांच्या मार्गदर्शनाखाली पोलीस कर्मचारी करीत आहेत. दरम्यान, पोलीस निरीक्षक लक्ष्मण केंद्रे हे वाळू माफियाविरोधात सातत्याने कडक कारवाई करत असून त्यांच्या या धडाकेबाज कारवाईमुळे अवैध वाळू वाहतूक करणाऱ्यांमध्ये चांगलाच वचक निर्माण होत असल्याचे नागरिकांमधून बोलले जात आहे.
संपादक : उध्दव नामदेवराव इंगळे
