पाथरी नगर परिषद निवडणूक : अंतिम दिवशी तिन्ही पक्षांचे जोरदार शक्ती प्रदर्शन;
पाथरी (प्रतिनिधी – उध्दव इंगळे,लोक योध्दा न्यूज) : पाथरी नगर परिषद निवडणूक 2025 साठी उमेदवारी अर्ज दाखल करण्याच्या शेवटच्या दिवशी काँग्रेस, राष्ट्रवादी काँग्रेस आणि शिवसेना शिंदे गटाने भव्य मिरवणुका काढत शक्ती प्रदर्शन केले. ढोल-ताशांचा गजर आणि समर्थकांच्या मोठ्या उपस्थितीमुळे शहरात दिवसभर निवडणुकीची रंगत जाणवली.
प्रमुख उमेदवारांमध्ये काँग्रेसचे माजी नगराध्यक्ष जुनैद खान दुर्राणी, शिवसेना शिंदे गटाचे आसेफ खान, तर राष्ट्रवादी काँग्रेस (अजितदादा गट) तर्फे माजी नगराध्यक्ष मोईज मास्टर अन्सारी यांनी मोठ्या शक्तीनिशी उमेदवारी अर्ज दाखल केले. काँग्रेसचे बाबाजानी दुर्राणी व शिवसेनेचे नेते सईद भैया खान,राष्ट्रवादीच्या मिरवणुकीत आमदार राजेशदादा विटेकर स्वतः उपस्थित होते.
भाजपची अनपेक्षित रणनिती :
स्वबळावर लढण्याची घोषणा करूनही भाजपने नगराध्यक्ष पदाचा उमेदवार न उतरवल्याने राजकीय चर्चांना ऊत आला आहे. भाजप शिंदे गटाला पाठिंबा देणार असल्याच्या चर्चा सध्या शहरात जोमात सुरू आहेत.
अंतिम दिवशी मोठ्या प्रमाणात गर्दी झाल्याने पोलिसांनी कडेकोट बंदोबस्त ठेवला होता.
नगराध्यक्ष पदासाठी 22 आणि सदस्य पदासाठी 201 अर्ज दाखल होताच पाथरीत चुरशीची तिरंगी लढत रंगण्याचे संकेत दृढ झाले असून सर्वच पक्षांनी मतदारांना प्रभावित करण्यासाठी जोरदार शक्ती प्रदर्शन केले.
संपादक : उध्दव नामदेवराव इंगळे
