पाथरी पोलिसांची मोठी कारवाई; ८.७४ लाखांचा प्रतिबंधित गुटखा जप्त
पाथरी | लोक योद्धा न्यूज
पाथरी पोलिसांनी रामपुरी–ढालेगाव मार्गावर कारवाई करत तब्बल ८ लाख ७४ हजार ३५० रुपयांचा प्रतिबंधित गुटखा, पानमसाला आणि एक कार जप्त केली. ही कारवाई शनिवारी (दि. २५ जुलै) पहाटे १.४० वाजण्याच्या सुमारास करण्यात आली.
या प्रकरणी अल्ताफ मजीत तांबोळी (रा. पाथरी) व एका अनोळखी इसमाविरुद्ध पाथरी पोलीस ठाण्यात गुन्हा क्रमांक ४०१/२०२६ दाखल करण्यात आला आहे. आरोपी प्रतिबंधित गुटखा व तंबाखूजन्य पदार्थांची विक्री करण्याच्या उद्देशाने वाहतूक करत असल्याचा आरोप असून, त्यांच्याविरुद्ध भारतीय न्याय संहिता तसेच अन्न सुरक्षा व मानके अधिनियम, २००६ अंतर्गत गुन्हा नोंदविण्यात आला आहे.
कारवाईदरम्यान ६ लाख रुपयांची स्विफ्ट डिझायर कार, ‘प्रीमियम राजनिवास’ पानमसाल्याच्या ४५ पिशव्या आणि ‘प्रीमियम Z-1 जाफरानी जर्दा’च्या ४४ पिशव्या असा एकूण ८ लाख ७४ हजार ३५० रुपयांचा मुद्देमाल जप्त करण्यात आला.
या प्रकरणाचा पुढील तपास पोलीस उपनिरीक्षक पवार करीत आहेत.
संपादक : उध्दव नामदेवराव इंगळे
