जि.प./पं.स. निवडणूक 2026 : नियुक्त कर्मचाऱ्यांचे पहिले प्रशिक्षण यशस्वीरीत्या संपन्न
उध्दव इंगळे, लोक योध्दा न्युज संपादक
पाथरी | प्रतिनिधी
परभणी जिल्हा परिषद व पंचायत समिती निवडणूक 2026 च्या पार्श्वभूमीवर नियुक्त करण्यात आलेल्या केंद्राध्यक्ष व मतदान अधिकाऱ्यांचे पहिले प्रशिक्षण सत्र शनिवार, दि. 24 जानेवारी रोजी आय.टी.आय. कॉलेज, विटा रोड, पाथरी येथे उत्साहात संपन्न झाले.
या प्रशिक्षण कार्यक्रमाला निवडणूक निर्णय अधिकारी तथा उपविभागीय अधिकारी पाथरी श्रीमती संगीता चव्हाण आणि सहायक निवडणूक निर्णय अधिकारी तथा तहसीलदार पाथरी श्री शंकर एन. हांदेशवार यांची प्रमुख उपस्थिती होती.
निवडणूक निर्णय अधिकारी श्रीमती संगीता चव्हाण यांनी पीपीटीच्या माध्यमातून निवडणूक प्रक्रियेतील सर्व टप्प्यांची सविस्तर माहिती देत अधिकारी व कर्मचाऱ्यांना आवश्यक सूचना केल्या. प्रत्यक्ष मतदान केंद्रावर उद्भवणाऱ्या अडचणी, कायदेशीर बाबी, मतदारांशी वागणूक तसेच पारदर्शक व निष्पक्ष निवडणूक पार पाडण्यासाठी घ्यावयाच्या खबरदारीबाबत मार्गदर्शन करण्यात आले.
मास्टर ट्रेनर श्री अजय भुसारे व श्री गजानन कुलकर्णी यांनी ईव्हीएम मशिनचे प्रत्यक्ष प्रात्यक्षिक सादर करत सर्व अधिकारी व कर्मचाऱ्यांकडून ईव्हीएम हाताळणी करून घेतली. यावेळी उपस्थित कर्मचाऱ्यांनी आपल्या शंका मांडल्या असून त्यांचे समाधानकारक निरसन करण्यात आले.
या प्रशिक्षणास गट शिक्षण अधिकारी श्री मुकेश राठोड, नायब तहसीलदार श्री वसंत महाजन, श्री रमेश धोपे, श्री हेमंत सुजलेगावकर, सहाय्यक महसूल अधिकारी श्री रघुनाथ केसकर, श्री मकरंद दलाल, मिडिया नोडल अधिकारी श्री संदीपान घुंबरे, श्री जामकर, श्री आर.ए. मनेरे, श्री गायकवाड यांच्यासह सर्व निवडणूक नियुक्त अधिकारी व कर्मचारी मोठ्या संख्येने उपस्थित होते.
निवडणूक प्रक्रिया पारदर्शक, शांततापूर्ण व नियमबद्ध पार पाडण्यासाठी हे प्रशिक्षण उपयुक्त ठरणार असल्याचे यावेळी स्पष्ट करण्यात आले.
संपादक : उध्दव नामदेवराव इंगळे
