🌿 परभणी जिल्ह्यात ‘तंबाखूमुक्त युवा अभियान’ प्रभावीपणे राबवावे — जिल्हाधिकारी संजयसिंह चव्हाण

🖋️ प्रतिनिधी : अहमद अन्सारी, पाथरी (परभणी)

परभणी, दि. 29 ऑक्टोबर 2025 — परभणी जिल्हा तंबाखूमुक्त करण्याच्या उद्देशाने राष्ट्रीय तंबाखू नियंत्रण कार्यक्रमांतर्गत जिल्हास्तरीय समन्वय समितीची बैठक जिल्हाधिकारी तथा अध्यक्ष संजयसिंह चव्हाण यांच्या अध्यक्षतेखाली बुधवारी (दि. 29) जिल्हाधिकारी कार्यालयात पार पडली.

बैठकीत जिल्ह्यातील सर्व विभागांमार्फत “कोटपा कायदा 2003” ची काटेकोर अंमलबजावणी करून ‘तंबाखूमुक्त युवा अभियान’ प्रभावीपणे राबविण्याचे निर्देश जिल्हाधिकारी चव्हाण यांनी दिले.

या बैठकीस महापालिका आयुक्त नितीन नार्वेकर, जिल्हा शल्यचिकित्सक व सदस्य सचिव (राष्ट्रीय तंबाखू नियंत्रण कार्यक्रम) डॉ. नागेश लखमावार, जिल्हा आरोग्य अधिकारी, महिला व बालकल्याण विभागाचे अधिकारी, शिक्षण विभागाचे प्रतिनिधी, चाईल्ड हेल्पलाईन प्रकल्प समन्वयक तसेच विविध विभाग प्रमुख उपस्थित होते.

जिल्हाधिकाऱ्यांनी शैक्षणिक संस्थांच्या 100 मीटर परिसरातील पानटपऱ्यांविरुद्ध तत्काळ कारवाई करण्याचे आदेश पोलीस विभाग आणि तंबाखू नियंत्रण कक्षाला दिले. तसेच सर्व शासकीय कार्यालये व संस्था ‘तंबाखूमुक्त क्षेत्र’ म्हणून घोषित करण्यासाठी आवश्यक ती कार्यवाही तातडीने करण्याच्या सूचनाही दिल्या.

बैठकीदरम्यान अधिकाऱ्यांना राष्ट्रीय तंबाखू नियंत्रण कार्यक्रमाची अंमलबजावणी प्रक्रिया व कोटपा कायद्याचे महत्त्व समजावून सांगण्यात आले. राज्यस्तरावर राबविण्यात येणाऱ्या साठ दिवसांच्या “तंबाखूमुक्त युवा अभियान” उपक्रमाची माहितीही यावेळी देण्यात आली.

सर्व विभागप्रमुखांना त्यांच्या कार्यक्षेत्रात तंबाखू, गुटखा सेवन अथवा धूम्रपान करणाऱ्या व्यक्तींवर कोटपा कायद्यानुसार 200 रुपयांपर्यंत दंड आकारण्याचे निर्देश देण्यात आले. तसेच जिल्ह्यातील किमान 30 गावे ‘तंबाखूमुक्त घोषित’ करण्याचे उद्दिष्ट निश्चित करण्यात आले.

या उपक्रमाद्वारे जनजागृती वाढवून, युवकांमध्ये तंबाखूमुक्त जीवनशैलीबाबत सकारात्मक बदल घडविणे हे जिल्हा प्रशासनाचे प्रमुख ध्येय असल्याचे जिल्हाधिकारी चव्हाण यांनी सांगितले.

लोक योद्धा

संपादक : उध्दव नामदेवराव इंगळे