अपहरण झालेल्या कापूस व्यापाऱ्याची सुटका; चार लाखांचा ऐवज लुटल्याचा आरोप
आर्थिक व्यवहाराच्या वादातून भरदिवसा धक्कादायक प्रकार; दोघे नामजदांसह चौघांविरुद्ध गुन्हा, एक आरोपी ताब्यात
लोक योद्धा न्युज संपादक उध्दव इंगळे
पाथरी—
पाथरी शहरात भरदिवसा कापूस व्यापाऱ्याचे अपहरण करून त्याला लोहा परिसरात नेल्याची धक्कादायक घटना शुक्रवारी (दि. २१ ऑगस्ट) घडली. आर्थिक व्यवहाराच्या वादातून व्यापाऱ्याला धमकावत त्याच्याकडील रोख रक्कम व सोन्याचे दागिने बळजबरीने काढून घेतल्याचा, तसेच फोन-पेवरून ९० हजार रुपये वर्ग करण्यास भाग पाडल्याचा आरोप आहे. या घटनेत सुमारे चार लाख दोन हजार रुपयांचा ऐवज लुटल्याचे तक्रारीत नमूद आहे.
पुरुषोत्तम गंगाभिषन सोमानी (वय ५८, रा. एकतानगर, पाथरी) हे सोने गहाण ठेवण्यासाठी मुथूट फायनान्सकडे जात असताना रेस्ट हाऊसजवळ पांढऱ्या रंगाच्या इनोव्हा वाहनातून आलेल्या व्यक्तींनी त्यांना जबरदस्तीने वाहनात बसविल्याचे फिर्यादीत म्हटले आहे. त्यानंतर त्यांना लोहा परिसरात नेण्यात आले.
तेथे आरोपींनी पैशांची मागणी करत सोमानी यांच्याशी धक्काबुक्की केली. त्यांच्या खिशातील २२ हजार रुपये रोख आणि सोन्याच्या दोन अंगठ्या काढून घेतल्याचा आरोप आहे. त्यानंतर त्यांच्या पत्नीला फोन करून आरोपींच्या फोन-पे खात्यावर ९० हजार रुपये वर्ग करण्यास भाग पाडल्याचे तक्रारीत नमूद आहे.
तसेच, आणखी दोन लाख ६० हजार रुपये देण्याची मागणी करत पैसे न दिल्यास जीवे मारण्याची धमकी दिल्याचा आरोप सोमानी यांनी केला आहे.
परिचित व्यापाऱ्यांच्या हस्तक्षेपानंतर सुटका
घटनेची माहिती मिळाल्यानंतर काही परिचित व्यापाऱ्यांनी हस्तक्षेप केला. त्यानंतर सोमानी यांची सुटका झाली आणि त्यांना पाथरी पोलिस ठाण्यात आणण्यात आले. पोलिसांनी त्यांचा जबाब नोंदवून तपास सुरू केला आहे.
या प्रकरणी रंगनाथ भुरे, महादू महागावकर (दोघे रा. लोहा, जि. नांदेड) आणि दोन अनोळखी व्यक्तींविरुद्ध भारतीय न्याय संहितेच्या कलम १४०(३), ३०९(६) व ३(५) अन्वये गुन्हा दाखल करण्यात आला आहे. पोलिसांनी एका आरोपीला ताब्यात घेतले असून, अन्य आरोपींचा शोध सुरू आहे.
प्रकरणाचा तपास पोलिस उपनिरीक्षक गणेश पवार करीत आहेत. अपहरणामागील आर्थिक व्यवहार, घटनेतील इतर आरोपींचा सहभाग आणि लुटलेल्या ऐवजाबाबत पोलिसांकडून तपास सुरू आहे.
भरदिवसा घडलेल्या या प्रकारामुळे पाथरीतील व्यापारी वर्तुळात खळबळ उडाली असून, या प्रकरणातील पुढील तपासाकडे नागरिकांचे लक्ष लागले आहे.
संपादक : उध्दव नामदेवराव इंगळे
