दिलेला शब्द पाळला; सेलू कॉर्नरवर विराजमान झाले शिवराय
पाथरी — उध्दव इंगळे ,लोक योद्धा न्युज संपादक
पाथरी शहरातील शिवप्रेमींच्या अनेक वर्षांच्या प्रतीक्षेला अखेर रविवारी (दि. २८) पूर्णविराम मिळाला. शहराच्या मध्यवर्ती सेलू कॉर्नर परिसरात छत्रपती शिवाजी महाराजांचा भव्य अश्वारूढ पुतळा उभारण्यात आला असून खासदार संजय जाधव यांच्या हस्ते त्याचे लोकार्पण करण्यात आले. नवनिर्वाचित आमदार सईद भैया खान, नगराध्यक्ष, लोकप्रतिनिधी, शिवसेना पदाधिकारी, शिवसैनिक आणि मोठ्या संख्येने उपस्थित नागरिकांच्या साक्षीने हा ऐतिहासिक सोहळा उत्साहात पार पडला.
पाथरी शहरात छत्रपती शिवाजी महाराजांचा अश्वारूढ पुतळा उभारण्याची मागणी अनेक वर्षांपासून होत होती. विधानसभा निवडणुकीपूर्वी शिवप्रेमींना दिलेले आश्वासन पूर्ण करण्याचा शब्द आमदार सईद भैया खान यांनी दिला होता. त्यानुसार नगरविकास विभागाची आवश्यक प्रशासकीय प्रक्रिया पूर्ण करून चबुतऱ्याचे काम यापूर्वीच करण्यात आले. काही तांत्रिक आणि प्रशासकीय कारणांमुळे उभारणीला विलंब झाला असला, तरी अखेर रविवारी पहाटे पुतळ्याची स्थापना करून सकाळी लोकार्पण सोहळा पार पडला.
यावेळी बोलताना आमदार सईद भैया खान यांनी, “विधानसभा निवडणुकीपूर्वी शिवप्रेमींना दिलेला शब्द माझ्यासाठी केवळ आश्वासन नव्हता, तर तो माझा संकल्प होता. छत्रपती शिवाजी महाराजांचा अश्वारूढ पुतळा उभारल्याशिवाय आमदारकीची शपथ घेणार नाही, असा निर्धार केला होता. आज तो शब्द पूर्ण झाल्याचा मनस्वी आनंद आहे,” असे सांगितले.
याप्रसंगी त्यांनी नगरविकास विभागाच्या सर्व प्रक्रिया पूर्ण करूनच हे काम मार्गी लावण्यात आल्याचे स्पष्ट केले. तसेच खासदार संजय जाधव यांच्या नेतृत्वाखाली पाथरी तालुका आणि परभणी जिल्ह्याच्या विकासासाठी अधिक जोमाने काम करण्यात येईल, अशी ग्वाहीही दिली.
लोकार्पण सोहळ्यानंतर सेलू कॉर्नर परिसर भगव्या ध्वजांनी आणि ‘जय भवानी, जय शिवाजी’च्या घोषणांनी दुमदुमून गेला. पुतळ्याचे दर्शन घेण्यासाठी दिवसभर नागरिकांची मोठी गर्दी उसळली होती. अनेकांनी हा दिवस पाथरीच्या इतिहासातील अभिमानाचा क्षण असल्याची भावना व्यक्त केली.
◼ लोक योद्धा विशेष
‘सेलू कॉर्नर’ची नवी ओळख — ‘छत्रपती शिवाजी महाराज चौक’
छत्रपती शिवाजी महाराजांचा अश्वारूढ पुतळा उभारल्यानंतर शहरातील सेलू कॉर्नरला नवी ऐतिहासिक ओळख मिळाली आहे. नागरिक आणि शिवप्रेमी आता या परिसराचा उल्लेख ‘छत्रपती शिवाजी महाराज चौक’ असा करू लागले आहेत. या पुतळ्यामुळे परिसराच्या ऐतिहासिक आणि सांस्कृतिक वैभवात मोलाची भर पडल्याची भावना नागरिकांनी व्यक्त केली.
संपादक : उध्दव नामदेवराव इंगळे
