न. प. निकालाच्या पार्श्वभूमीवर पाथरीत कडेकोट पोलिस बंदोबस्त मुख्य रस्त्यांवर पथसंचलन; रॅपिड फोर्स तैनात
पाथरी प्रतिनिधी :अहेमद अन्सारी
पाथरी नगरपरिषद निवडणुकीच्या निकालाकडे संपूर्ण मराठवाड्याचे लक्ष लागले असून ही निवडणूक प्रशासनाच्या दृष्टीने अतिसंवेदनशील ठरली आहे. रविवार, दि. २१ डिसेंबर रोजी होणाऱ्या मतमोजणीच्या पार्श्वभूमीवर शहरात कायदा-सुव्यवस्था अबाधित राहावी यासाठी पोलिस प्रशासनाने कडेकोट बंदोबस्त ठेवला आहे.शनिवारी सायंकाळी शहरात पोलीस प्रशासनाच्या वतीने पतसंचलन करण्यात आले.
आयटीआय, विटा रोड, पाथरी येथे अकरा प्रभागांतील उमेदवारांसह नगराध्यक्ष पदासाठी एकूण अकरा टेबलांवर मतमोजणी होणार असून दुपारी दोन वाजेपर्यंत प्राथमिक निकाल हाती येण्याचा अंदाज व्यक्त करण्यात आला आहे.
मागील दोन-तीन वर्षांत घडलेल्या राजकीय वाद, भांडणे व तणावपूर्ण घटनांचा अनुभव लक्षात घेता यावेळी अतिरिक्त रॅपिड फोर्स तैनात करण्यात येणार आहे. कुठलाही अनुचित प्रकार घडल्यास कठोर कारवाई करण्यात येईल, असा इशारा पाथरी पोलीस ठाण्याचे फौजदार लक्ष्मण केंद्रे यांनी दिला आहे.
निवडणूक म्हणजे विजय-पराजय हा लोकशाहीचा भाग असून कोणत्याही कार्यकर्त्यांनी किंवा समर्थकांनी कायदा हातात घेऊ नये. आपल्या व कुटुंबाच्या भविष्याशी खेळ करू नये, असे आवाहन पोलिस प्रशासनातर्फे करण्यात आले आहे.
काँग्रेस, राष्ट्रवादी काँग्रेस तसेच शिवसेना (शिंदे गट) या प्रमुख पक्षांसाठी ही निवडणूक प्रतिष्ठेची व अस्तित्वाची ठरली असून जिल्हाध्यक्षांची कसोटी लागली आहे. या निकालाचा परिणाम आगामी जिल्हा परिषद, पंचायत समिती व ग्रामपंचायत निवडणुकांवरही होणार असल्याने ही लढत अत्यंत अटीतटीची झाली आहे.
या पार्श्वभूमीवर शहरात तणावाचे वातावरण असले तरी शांतता व सुव्यवस्था राखण्यासाठी पोलिस प्रशासन सज्ज असून मुख्य रस्त्यांवर पथसंचलन व नाकाबंदी करण्यात आली आहे. नागरिकांनी सहकार्य करावे, असे आवाहनही प्रशासनातर्फे करण्यात आले आहे.
संपादक : उध्दव नामदेवराव इंगळे
