लोणी बु शाळेच्या माजी विद्यार्थी मेळाव्यास उदंड प्रतिसाद!
लोणी बु शाळेच्या माजी विद्यार्थी मेळाव्यास उदंड प्रतिसाद!
शासनाच्या जीआरनुसार राज्यातील पहिल्याच आदर्श शाळेकडून ‘माजी विद्यार्थी समिती’ स्थापन; २ लाख रुपयांचा निधी जमा
उध्दव इंगळे पाथरी
प्रतिनिधी : दि. 21 ऑक्टोबर 2025 रोजी जिल्हा परिषदेच्या प्राथमिक शाळा, लोणी बु (ता. पाथरी, जि. परभणी) येथे सकाळी 8.00 ते 11.00 या वेळेत आयोजित ‘माजी विद्यार्थी मेळाव्यास’ गावातील बहुसंख्य माजी विद्यार्थी उत्स्फूर्तपणे उपस्थित राहिले. जुन्या आठवणींना उजाळा देत त्यांनी आपल्या शाळेच्या विकासासाठी सढळहाताने योगदान दिले आणि लोणी गावाचा अभिमान पुन्हा एकदा वाढवला.
दि. 1 ऑक्टोबर 2025 रोजीच्या शालेय शिक्षण विभागाच्या शासन आदेशानुसार, राज्यातील प्रत्येक शाळेत ‘माजी विद्यार्थी समिती’ स्थापन करण्याचे निर्देश देण्यात आले होते. या आदेशाची अंमलबजावणी प्रभावीपणे करणारी आणि राज्यस्तरावर अशा प्रकारचा कार्यक्रम सर्वप्रथम आयोजित करणारी शाळा म्हणून लोणी बु शाळेने आदर्श निर्माण केला आहे.
— मुख्याध्यापक सुभाष चिंचाने सरांच्या आवाहनास प्रतिसाद देत माजी विद्यार्थ्यांनी केवळ सहभागच नव्हे, तर जवळपास ₹2,00,000 इतका निधी तात्काळ जमा करून शाळेच्या सर्वांगीण विकासाला नवे बळ दिले. हा क्षण शाळेच्या इतिहासातील सुवर्णक्षण ठरल्याचे गौरवोद्गार तालुका गटशिक्षणाधिकारी राठोड साहेबांनी यावेळी काढले.
त्यांनी लोणी बु शाळेच्या उल्लेखनीय प्रगतीचे कौतुक करत म्हटले —
“विद्यार्थ्यांच्या गुणवत्ताविकासासह हिरवाईने नटलेला परिसर, स्वच्छता, प्रयोगशाळा, समृद्ध ग्रंथालय, कॉम्प्युटर लॅब आणि नाविन्यपूर्ण शिक्षण पद्धती ही शाळेची खरी ओळख बनली आहे.”
* माजी विद्यार्थी समितीची सर्वानुमते निवड—-
या मेळाव्यात सर्वानुमते स्थापन झालेल्या *‘माजी विद्यार्थी समिती’*च्या अध्यक्षपदी राज्य आदर्श शिक्षक पुरस्कारप्राप्त आदरणीय पृथ्वीराज धर्मे यांची, तर उपाध्यक्षपदी महाराष्ट्र पोलिस दलातील हरिश्चंद्र खूपसे यांची निवड करण्यात आली.
“ज्यांची बाग फुलून आली त्यांनी दोन फुले द्यावीत, ज्यांचे सूर जुळून आले त्यांनी सुंदर गाणी द्यावीत…”
या ओळींना सार्थ ठरवत माजी विद्यार्थ्यांनी दिलेल्या सढळ सहकार्याने शाळेत जणू दिवाळीचेच वातावरण निर्माण झाले. राठोड साहेबांनी यावेळी म्हटले — “आज खरी दिवाळी इथेच उजळली आहे.”
— गावकऱ्यांची दाद-
गावातील नागरिक, पालक, शिक्षणप्रेमी व माजी विद्यार्थ्यांनी मुख्याध्यापक सुभाष चिंचाने सर आणि त्यांच्या सर्व शिक्षकवृंदाचे मनःपूर्वक अभिनंदन केले. “राज्यस्तरीय जीआरची प्रभावी अंमलबजावणी करून आदर्श निर्माण करणारी ही शाळा आम्हा सर्वांसाठी प्रेरणास्थान ठरली आहे”, अशी प्रतिक्रिया ग्रामस्थांकडून व्यक्त करण्यात आली.
* कार्यक्रमाचे यशस्वी आयोजन*
कार्यक्रमाचे प्रास्ताविक मुख्याध्यापक सुभाष चिंचाने सरांनी, तर सूत्रसंचालन आदर्श शिक्षक श्यामकुमार बगाटे सरांनी प्रभावीपणे केले. कार्यक्रमाच्या यशस्वीतेसाठी शिक्षकवर्ग, SMC समिती सदस्य, शिक्षणप्रेमी नागरिक आणि विद्यार्थी यांचे मोलाचे योगदान लाभले.
संपादक : उध्दव नामदेवराव इंगळे
