उमेदवारांच्या उपस्थितीत ईव्हीएम सीलिंगची प्रक्रिया पूर्ण; निवडणूक निरीक्षकांची पाहणी!
पाथरी : नगर परिषद पाथरीच्या सार्वत्रिक निवडणुकीच्या पार्श्वभूमीवर 29 नोव्हेंबर रोजी आयटीआय कॉलेज येथे सकाळी 9 वाजता निवडणूक निर्णय अधिकारी सौ. अरुणा संगेवार यांच्या मार्गदर्शनाखाली ईव्हीएम सीलिंगची महत्त्वपूर्ण प्रक्रिया पार पडली. सर्व उमेदवार व त्यांच्या प्रतिनिधींच्या उपस्थितीत मास्टर ट्रेनर, झोनल अधिकारी आणि निवडणूक कर्मचाऱ्यांनी काटेकोर तपासणीसह ईव्हीएम सीलिंगचे कार्य पूर्ण केले.
प्रत्येक ईव्हीएमची कार्यपद्धती, क्रमांक आणि सुरक्षिततेची दुजोरा देत एकएक मशीनची बारकाईने पाहणी करण्यात आली. निवडणूक प्रक्रियेतील हा अत्यंत महत्त्वाचा टप्पा निर्विघ्नपणे आणि पारदर्शक पद्धतीने पार पडल्याने उमेदवारांनी समाधान व्यक्त केले.
निवडणूक निरीक्षकांचा प्रत्यक्ष पाहणी दौरा
ईव्हीएम सीलिंगदरम्यान निवडणूक निरीक्षक श्री. राजेश काटकर यांनी प्रत्यक्ष भेट देऊन संपूर्ण कार्यपद्धतीचा आढावा घेतला. त्यांनी विविध कक्षातील अधिकारी व कर्मचाऱ्यांची बैठक घेऊन मतदान, मतमोजणी, कायदा-सुव्यवस्था, यंत्रणा समन्वय आदी बाबींवर मार्गदर्शनासह आवश्यक सूचना दिल्या.
या वेळी निरीक्षकांचे संपर्क अधिकारी श्री. गणेश शिंदे, सहाय्यक निवडणूक निर्णय अधिकारी श्री. युवराज पौळ, श्री. कृष्णा देशमुख, श्री. प्रज्ञावंत कांबळे, श्री. दत्ता गिनगिने तसेच इतर कर्मचारी उपस्थित होते.
पाथरी नगरपरिषद निवडणुकीसाठी ईव्हीएम सीलिंगची प्रक्रिया शिस्तबद्ध रीतीने पूर्ण झाल्याने मतदानाचा मार्ग सुकर झाला आहे.
संपादक : उध्दव नामदेवराव इंगळे
