लोकशाहीच्या महायज्ञाची सुरुवात! मतदान यंत्रासह पोलिंग पथके मतदान केंद्रांकडे रवाना
उध्दव इंगळे, लोक योध्दा न्युज पाथरी
पाथरी नगरपरिषद सार्वत्रिक निवडणूक २०२५ साठी आजपासून लोकशाहीच्या उत्सवाचे औचित्य साधत संपूर्ण निवडणूक प्रक्रिया अधिकृतपणे सुरू झाली आहे. शहरातील औद्योगिक प्रशिक्षण संस्था, विटा रोड, पाथरी येथून सकाळपासूनच पोलिंग पथकांची धामधूम दिसत होती. मतदान यंत्रे, आवश्यक साहित्य, अधिकाऱ्यांची उपस्थिती आणि प्रशासनाचे काटेकोर नियोजन यामुळे परिसरात निवडणुकीचे वातावरण अधिक रंगतदार झाले.
तीन टप्प्यात प्रशिक्षण – मतदान प्रक्रिया बिनचूक होण्याची खात्री
निवडणूक प्रशासनाकडून सर्व मतदान अधिकाऱ्यांना तीन वेळेस सखोल प्रशिक्षण देण्यात आले. यानुसार आज प्रत्यक्ष हॅंड्स ऑन ट्रेनिंग घेण्यात आले. केंद्राध्यक्ष, मतदान अधिकारी १, २, ३ यांनी यंत्रे प्रत्यक्ष हाताळून मॉक पोल पार पडले. त्यामुळे मतदान दिवशी कोणतीही तांत्रिक किंवा प्रक्रिया विषयक अडचण येणार नाही, अशी खात्री प्रशासनाने व्यक्त केली.
स्ट्राँग रूम उघडण्याची प्रक्रिया पारदर्शकतेने
उमेदवार व त्यांचे प्रतिनिधी यांच्या उपस्थितीत निवडणूक निरीक्षक श्री. राजेश काटकर यांच्या प्रमुख उपस्थिती स्ट्राँग रूम उघडण्यात आली. पारदर्शकतेच्या नियमांचे कठोर पालन करत ही प्रक्रिया सुरळीतपणे पार पडली.
२ डिसेंबरला सकाळी ७:३० वाजता मतदानाला प्रारंभ
२ डिसेंबर रोजी मतदानाच्या दिवशी उमेदवार किंवा त्यांचे प्रतिनिधी उपस्थित असताना सकाळी ६:३० वाजता मॉकपोल होईल. त्यानंतर सकाळी ७:३० ते संध्याकाळी ५:३० या वेळेत मतदान प्रक्रिया पार पडणार आहे.
मतदानाची टक्केवारी वाढविण्यासाठी विशेष उपक्रम
निवडणूक निर्णय अधिकारी श्रीमती अरुणा संगेवर यांनी सांगितले की मतदार जागृतीसाठी प्रशासनाकडून विविध उपक्रम राबविण्यात आले असून, त्याचा मतदानाच्या टक्केवारीवर सकारात्मक परिणाम दिसून येईल.
अधिकाऱ्यांची परिपूर्ण व्यवस्था
प्रशिक्षणाच्या ठिकाणी सर्व अधिकारी व कर्मचाऱ्यांच्या निवास, भोजन व सुरक्षिततेची उत्तम व्यवस्था करण्यात आली.
निवडणूक कामे यशस्वी करण्यासाठी युवराज पौळ, कृष्णा देशमुख, मुख्याधिकारी कांबळे, दत्ता गिनगिने, श्री. रेड्डी आणि सर्व नियुक्त अधिकारी-कर्मचारी एकजुटीने काम करत आहेत.
२ डिसेंबर – मतदानाचा महासण!
आज पोलिंग पथके रवाना होताच पाथरीत लोकशाहीचा जल्लोष सुरू झाला. उद्या होणाऱ्या मतदानाद्वारे शहर आपली पुढील पाच वर्षांची दिशा ठरवणार आहे.
- आपला मतदानाचा हक्क बजावून लोकशाहीच्या या उत्सवात सहभागी व्हा!
संपादक : उध्दव नामदेवराव इंगळे
