नगर परिषद पाथरी निवडणूक : नियुक्त कर्मचारी प्रशिक्षण संपन्न !
उध्दव इंगळे,लोक योद्धा न्यूज
पाथरी : नगर परिषद पाथरी सार्वत्रिक निवडणूक 2025 अनुषंगाने प्रत्यक्ष मतदान केंद्रावर काम करण्यासाठी नियुक्त केंद्राध्यक्ष व मतदान अधिकाऱ्यांचे प्रथम प्रशिक्षण मंगळवारी (19 नोव्हेंबर) महात्मा फुले मंगल कार्यालय, पाथरी येथे संपन्न झाले.
शहरातील एकूण 38 मतदान केंद्रांसाठी केंद्राध्यक्ष 71, सहाय्यक केंद्राध्यक्ष 59 आणि इतर मतदान अधिकारी 213 असे एकूण 343 अधिकारी व कर्मचारी नियुक्त करण्यात आले आहेत. तसेच प्रत्येक मतदान केंद्रासाठी स्वतंत्रपणे 1 मतदान केंद्र अधिकारी अशी 38 जणांची नेमणूकही करण्यात आली आहे.
प्रशिक्षणात निवडणूक निर्णय अधिकारी सौ. अरुणा संगेवार यांनी निवडणूक प्रक्रियेचे सुबोध व सखोल मार्गदर्शन केले. मतदान केंद्रावर उद्भवू शकणाऱ्या अडचणी, त्यावरील उपाययोजना, तसेच कामकाजाची अचूकता याबाबत त्यांनी अधिकारी-कर्मचाऱ्यांना आवश्यक सूचना दिल्या. यावेळी स्क्रीनद्वारे पीपीटी सादरीकरणातून निवडणूक प्रक्रियेची माहिती देण्यात आली.
मास्टर ट्रेनर यांनी ईव्हीएम व व्हीव्हीपॅट मशीनचे प्रत्यक्ष प्रात्यक्षिक देत मशीन हाताळणीची संपूर्ण माहिती दिली. त्यानंतर बाजूच्या नेताजी विद्यालयात सर्व अधिकारी-कर्मचाऱ्यांना प्रत्यक्ष ईव्हीएम हाताळण्याची संधी देण्यात आली.
यावेळी सहायक निवडणूक निर्णय अधिकारी श्री. युवराज पौळ, कृष्णा देशमुख, गट शिक्षणाधिकारी श्री. मुकेश राठोड, तसेच श्री. गीनगीने उपस्थित होते व त्यांनीही मार्गदर्शन केले.
प्रथम प्रशिक्षणाला सर्व नियुक्त अधिकारी व कर्मचारी उपस्थित होते. पुढील दुसरे प्रशिक्षण 24 नोव्हेंबर रोजी सकाळी 10 वाजता याच ठिकाणी आयोजित करण्यात येणार असल्याची माहिती या वेळी देण्यात आली.
— लोक योद्धा न्यूज
संपादक : उध्दव नामदेवराव इंगळे
