न.प. निवडणुकीच्या पार्श्वभूमीवर पाथरीत मान्यवरांचा राष्ट्रवादी काँग्रेसमध्ये प्रवेश
माजी नगराध्यक्षांसह विविध पक्षांचे पदाधिकारी अजितदादांच्या नेतृत्वावर विश्वास ठेवत राष्ट्रवादी काँग्रेसमध्ये
लोक योध्दा उध्दव इंगळे –
पाथरी नगरपरिषद निवडणुकीच्या पार्श्वभूमीवर आज पाथरीत मोठी राजकीय हालचाल घडली आहे. विविध पक्षांतील मान्यवर, माजी नगराध्यक्ष आणि नगरसेवक यांनी उपमुख्यमंत्री अजितदादा पवार यांच्या नेतृत्वावर विश्वास व्यक्त करत राष्ट्रवादी काँग्रेस (अजित पवार गट) मध्ये जाहीर प्रवेश केला. या प्रवेशामुळे राष्ट्रवादी काँग्रेस पक्षाला पाथरी परिसरात नवी ऊर्जा व संघटनात्मक बळकटी मिळाल्याची चर्चा राजकीय वर्तुळात रंगली आहे.
मुंबई येथे झालेल्या या प्रवेश सोहळ्यास उपमुख्यमंत्री तथा राष्ट्रवादी काँग्रेसचे राष्ट्रीय अध्यक्ष अजितदादा पवार, प्रदेशाध्यक्ष खा. सुनील तटकरे तसेच पक्षाचे वरिष्ठ नेते उपस्थित होते. या वेळी पाथरीतील अनेक मान्यवरांचा राष्ट्रवादी काँग्रेसमध्ये जाहीर प्रवेश झाला.
या नवप्रवेशितांमध्ये माजी नगराध्यक्ष मोईजभाई अन्सारी, तसेच विविध पक्षांतील प्रमुख पदाधिकारी व कार्यकर्त्यांचा समावेश आहे. यामध्ये अनिस फारुकी (काँग्रेस), सईद अन्सारी (माजी नगरसेवक, शिवसेना), शाखेर सिद्दीकी (माजी नगरसेवक, शिवसेना), डॉ. तौफिक शेख (काँग्रेस), अ. मजीद अन्सारी, रहीम अन्सारी, वली पाशा कुरेशी (माजी नगरसेवक, शिवसेना), वाजेद बेग, कृष्णा गिराम, चंद्रकांत हारकळ, विठ्ठल थोरात (भाजपा), आरिफ एजाज कादरी, तज्जमुळ फारोखी, शायान फारुख फारुखी, शहानवाज फारोखी (भाजपा), एजाज सिद्दीकी (शिवसेना), सय्यद सद्दाम, अतीम फुळवरे, नाना तुपसमिंद्रे, अरुण वाकडे, चंद्रसिंग नाईक, आकाश क्षीरसागर (भाजपा), सागर कदम, जमीर पटेल, शेख अशफाक, नाजीम कुरेशी, कालू कुरेशी, बिट्टू कुरेशी आदींचा समावेश आहे.
या सर्व नवप्रवेशितांचे पक्षात स्वागत करताना अजितदादा पवार म्हणाले —
“राष्ट्रवादी काँग्रेस पक्ष हा सर्वसामान्य जनतेच्या विकासासाठी आणि प्रगतीसाठी कार्यरत आहे. एकजुटीने आणि जनतेच्या विश्वासाने काम करत राहा. स्थानिक स्वराज्य संस्थांच्या निवडणुकीच्या पार्श्वभूमीवर गावोगावी जाऊन जनतेचा कौल ऐका, शासकीय योजनांची माहिती द्या आणि त्यांच्या अडचणी समजून घ्या. पाथरी नगरपरिषदेत राष्ट्रवादी काँग्रेसचा झेंडा फडकवला जाईल, असा मला विश्वास वाटतो.”
या प्रसंगी आमदार राजेश विटेकर, अध्यक्ष शिवाजीराव गर्जे, लतीफभाई तांबोळी, तसेच राष्ट्रवादी काँग्रेस पक्षाचे वरिष्ठ पदाधिकारी, कार्यकर्ते आणि नवप्रवेशित मान्यवर मोठ्या संख्येने उपस्थित होते.
👉 पाथरीतील या प्रवेशामुळे राष्ट्रवादी काँग्रेस पक्षाला निवडणुकीआधी संघटनात्मक बळकटी लाभली असून स्थानिक राजकारणात नवीन समीकरणे निर्माण होण्याची शक्यता व्यक्त केली जात आहे.
संपादक : उध्दव नामदेवराव इंगळे
