*ग्रामीण जिल्हा काँग्रेस अध्यक्षपदी माजी आमदार बाबाजानी दुर्राणी*
दुर्राणींच्या नेतृत्वाखाली काँग्रेस संघटन नव्या जोमाने सज्ज
उध्दव इंगळे पाथरी
बराच काळ प्रलंबित असलेला निर्णय अखेर जाहीर झाला असून, माजी आमदार बाबाजानी दुर्राणी यांची परभणी ग्रामीण जिल्हा काँग्रेस कमिटीच्या अध्यक्षपदी अधिकृत नियुक्ती करण्यात आली आहे. महाराष्ट्र प्रदेश काँग्रेस कमिटीचे वरिष्ठ उपाध्यक्ष अॅड. गणेश पाटील यांनी २८ ऑक्टोबर २०२५ रोजी जारी केलेल्या पत्राद्वारे ही नियुक्ती घोषित केली.
या नियुक्तीबद्दल दुर्राणी यांनी प्रांताध्यक्ष हर्षवर्धन सपकाळ आणि वरिष्ठ उपाध्यक्ष गणेशराव पाटील यांचे आभार मानले आहेत.
ते म्हणाले —
“काँग्रेस पक्षात प्रवेश केल्यानंतर आम्ही जुन्या पदाधिकाऱ्यांना सोबत घेऊन जिल्हाभर संघटन पुन्हा उभं केलं.
पक्षाचं स्थान मजबूत करण्यासाठी ही नियुक्ती आमच्या तळमळीला नवे पंख देणारी ठरेल.”
दुर्राणी यांनी आगामी स्थानिक स्वराज्य संस्था निवडणुकांमध्ये
परभणी जिल्ह्यात काँग्रेसला दैदिप्यमान यश मिळवून देण्याचा निर्धार व्यक्त केला.
ते पुढे म्हणाले —
“जनतेच्या प्रश्नांसाठी आम्ही रस्त्यावर उतरणार आहोत. निष्क्रिय सरकारला धारेवर धरत जनसामान्यांचा आवाज बुलंद करू.”
राष्ट्रीय नेतृत्वाला अभिवादन करत दुर्राणी यांनी सांगितले की,
“राष्ट्रपिता महात्मा गांधी यांच्या विचारांनी प्रेरित होऊन
मा. मल्लिकार्जुन खर्गे, मा. सोनिया गांधी, मा. राहुल गांधी, मा. प्रियांका गांधी आणि मा. रमेश चेन्नीथला यांच्या नेतृत्वात
पक्षाची वाटचाल समर्पित भावनेनं करू.”
या नियुक्तीनंतर जिल्ह्यातील काँग्रेस कार्यकर्त्यांमध्ये उत्साहाचे वातावरण असून,
“दुर्राणींच्या नेतृत्वाखाली काँग्रेस पुन्हा बळकट होईल,” असा विश्वास कार्यकर्त्यांकडून व्यक्त होत आहे.
संपादक : उध्दव नामदेवराव इंगळे
