🏆 नवोदयमध्ये रेनाखळीचा हिरा झळकला; सोहम हरकळचा जंगी सत्कार

उध्दव इंगळे लोक योध्दा संपादक

पाथरी तालुक्यातील रेणाखळी या

ग्रामीण भागातील मर्यादित साधनसुविधांमध्येही गुणवत्तेच्या बळावर यश संपादन करता येते, याचा आदर्श घालून देत पीएमश्री जिल्हा परिषद प्राथमिक व माध्यमिक शाळा, रेनाखळीचा विद्यार्थी सोहम ज्ञानेश्वर हरकळ याने नवोदय विद्यालय प्रवेश परीक्षेत घवघवीत यश मिळवत गावाचा अभिमान उंचावला आहे.

विशेष म्हणजे, कोणत्याही खासगी शिकवणी वर्गाचा आधार न घेता, केवळ शाळेतील शिक्षकांच्या मार्गदर्शनावर व स्वतःच्या जिद्दीच्या जोरावर सोहमने ही उल्लेखनीय कामगिरी साध्य केली. त्याच्या या यशामुळे संपूर्ण रेनाखळी गावात आनंदाचे वातावरण निर्माण झाले आहे.

या यशाचे औचित्य साधून गावकऱ्यांच्या वतीने भव्य मिरवणूक काढत सोहमचा जंगी सत्कार करण्यात आला. यावेळी शाळा व्यवस्थापन समिती, ग्रामपंचायत तसेच शाळेच्या वतीने त्याचा सन्मान करण्यात आला. प्रसंगी सोहमचे आई-वडील, आजी-आजोबा यांचाही सत्कार करून त्यांच्या योगदानाची दखल घेण्यात आली.

सोहमच्या यशामागे वर्षभर अथक परिश्रम घेणारे मार्गदर्शक श्री. शिरसे सर, श्री. कांबळे सर व श्रीमती साबळे मॅडम यांचेही पालकांच्या वतीने विशेष अभिनंदन व सत्कार करण्यात आला. ऊन, वारा, पाऊस याची पर्वा न करता, अगदी सुट्टीच्या दिवशीही विद्यार्थ्यांसाठी दिलेल्या त्यांच्या मेहनतीमुळेच हे यश शक्य झाल्याची भावना यावेळी व्यक्त करण्यात आली.

या प्रसंगी ग्रामपंचायत सदस्य, आदरणीय गटशिक्षणाधिकारी, केंद्रप्रमुख, मुख्याध्यापक, शिक्षकवर्ग तसेच सर्व ग्रामस्थांनी सोहमचे अभिनंदन करून त्याच्या उज्ज्वल भविष्यासाठी शुभेच्छा दिल्या.

“रेनाखळीचा हिरा नवोदयमध्ये झळकला” या शब्दांत गावकऱ्यांनी आपल्या अभिमानाची भावना व्यक्त केली.

लोक योद्धा

संपादक : उध्दव नामदेवराव इंगळे